Uşaqlıqdankənar (boru) hamiləlik

Risk amilləri (ümumi məlumat)

Əvvəlki uşaqlıqdankənar hamiləlik, borularda keçirilmiş əməliyyatlar və iltihablar, siqaret, köməkçi reproduktiv texnologiyalar, spiral fonunda yaranan hamiləlik. Risk amili olmayan qadınlarda da rast gəlinə bilər.

Erkən dövrdə «döl kisəsi görünmür» — bu boru hamiləliyidirmi?

Həkimin izahına görə, aybaşı cəmi bir həftə gecikibsə və ultrasəsdə döl kisəsi hələ görünmürsə, boru hamiləliyi diaqnozu qoymaq üçün çox tezdir — ən çox rast gəlinən səbəb gec ovulyasiyadır. Dinamikanı izləmək üçün qanda XQ 48 saat ara ilə iki dəfə yoxlanılır. XQ artımı çox zəifdirsə, yerində sayırsa və ya azalırsa, eyni zamanda aşağı qarında kəskin ağrı və ləkələnmə varsa, boru hamiləliyi şübhəsi artır və daha yaxın nəzarət lazımdır. Ətraflı: Test müsbətdir, döl kisəsi görünmür.

Müalicə variantları (ümumi məlumat)

• Müşahidə — XQ aşağı və azalan, şikayət olmayan seçilmiş hallarda.
• Dərman müalicəsi — müəyyən meyarlara uyğun hallarda.
• Laparoskopik əməliyyat — borunun saxlanılması (tubotomiya) və ya borunun götürülməsi (tubektomiya).

Borunu saxlamaq mümkündürmü?

Borunun saxlanılması qanaxmadan, borunun zədələnmə dərəcəsindən, hamiləliyin yerindən və digər borunun vəziyyətindən asılıdır; yekun qərar çox vaxt əməliyyat zamanı verilir. Beynəlxalq randomizə edilmiş araşdırma (ESEP, 2014) göstərib ki, digər boru sağlam olduqda borunun saxlanılması və götürülməsi sonrakı təbii hamiləlik şansına oxşar təsir göstərir; boru saxlandıqda isə hamiləlik toxumasının qalması ehtimalı daha yüksəkdir və əməliyyatdan sonra XQ izlənir. Buna görə qərar fərdi verilir.

Hansı əlamətlər gecikdirilməməlidir?

Hamiləlik testi müsbət olduqda və ya aybaşı gecikdikdə qəfil güclü qarın ağrısı, çiyinə yayılan ağrı, başgicəllənmə, huşun itməsi və ya qanaxma — bunlar daxili qanaxmanın əlaməti ola bilər və gecikmədən müayinə tələb edir.